Монгол хатдын өргөө цогцолбор

Хэнтий аймгийн Баян-Адарга сумын нутаг Дуурлиг нарсны дэнж хэмээх газар Монгол төрийн үе үеийн түүхийг бүтээлцсэн их хатдад зориулсан хүндэтгэлийн өргөө цогцолборыг барьж байгуулжээ. 

Энэ нутагт Монголын сүүлчийн хаан VIII Богд Жавзандамба хутагтын хатан Ц.Дондогдулам, Н.Гэнэнпэл нар төрж өссөн нутаг ажээ. Тийм ч учраас багц таван сумны бөх батыг балчир хөвгүүддээ ухааруулсан Алангуа хатан, эзэн богд Чингис хааны эх Өүлэн хатан, агуу төрийн долоон эрдэний нэг Бөртэ хатан, хан хөвгүүн Тулуйн журамт хатан Сорхагтан бэх, Өгөөдэй хааны дараа Монголын төрийн таван жил залсан Дөргөн хатан нарын есөн хатанд зориулан уг хөшөө цогцолборыг босгосон байна. Тэдний дотор Мандухай, Өндөр гэгээний ээж Ханджамц, Галдан бошготын хатан Ану мөн Богд хааны соёрхолт хатан Дондогдулам нар багтаж байгаа ажээ.

Монгол хатдын бортгон малгай хэлбэртэй гол өргөөг тойруулан дөрвөн их суварга, есөн цагаан гэрийг босгожээ. Гол өргөөний хойморт хатдын сэнтийг залсан байх бөгөөд эргэн тойронд дээрх хатдын хөргийг байрлуулсан байна. Мөн өргөөний голд есөн хөлт их цагаан туг байх ажээ.

АЯЛАГЧДАД ӨГӨХ ЗӨВЛӨГӨӨ

• Гэрэл зураг: Өргөөний ерөнхий панорамыг Онон голын хөндий болон тэнгэрийн хаяатай багтааж авах нь хамгийн сүрлэг харагддаг. Мөн хатдын хөшөө, барилгын нарийн хийцүүд гэрэл зурагт маш өвөрмөц буудаг.

• Танин мэдэхүй: Хэрэв та гэр бүлээрээ, ялангуяа хүүхдүүдтэйгээ аялж байгаа бол Монгол хатдын түүхийг ярьж өгөх, тэдний ухаан, тэвчээрээс суралцахад хамгийн тохиромжтой газар юм.

• Зам харгуй: Баян-Адарга сум руу очих зам шороон болон сайжруулсан зам хосолсон байдаг. Бага зэрэг бартаатай тул суудлын машинаас илүүтэй туулах чадвар сайтай машин сонгохыг зөвлөж байна.

• Ойр орчим: Энд ирсэн бол Дуурлиг нарсны Хүннүгийн булш болон Онон голын эрэг дээрх бусад түүхэн газруудыг үзэж аяллаа үргэлжлүүлээрэй.